Демократскиот сојуз повикува на разумно и одговорно однесување од политичкиот врв, како и од лидерите на политичките партии за да не се наруши стабилноста на државата и нормалното одвивање на животот.
Според ДС постои општ граѓански консензус, за две клучни работи: да се одложат изборите и да се повлече аболицијата.
– Укажуваме дека нема Уставни и законски пречки да се свика Парламентот, при што, ако Трајко Вељаноски, не сака да го свика, тоа можат да го направат самите пратеници и Парламентот да донесе одлука за одложување на изборите, се вели во соопштението на ДС.
Имено согласно член 15 став 4 од Изборниот законик, мандатот на пратениците трае се до конституирање на Парламентот во нов состав.
Оттаму укажуваат и дека нема уставни и деловнички пречки за свикување на седница на Парламентот, но во праксата по самораспуштање, тој не заседава, за да не се користи за предизборни цели, но и натаму е во постојано заседание, што е предвидено и со член 66 став 1 од Уставот на Р. Македонија и член 5 став 1 од Деловникот на Собранието.
– Во врска со аболицијата на корумпираните политичари, која е и спротивна на Уставот и законите, но и на здравиот разум, Ѓорге Иванов, може да ја повлече одлуката за аболиција, со нова одлука, порачува ДС.
Демократскиот сојуз ги повикува сите граѓани да направат се што е во нивна моќ, протестите да се одвиваат на мирен начин, како демократски чин на искажување на незадоволство.
Воедно партијата апелира до медиумите, особено како што велат, провладините, објективно да информираат и да не учествуваат во создавање на атмосфера на страв и несигурност кај граѓаните.