Либерално-демократската партија прашува зошто државното јавно обвинителство, предводено од Марко Зврлевски се уште не постапува по пријавата за минатогодишниот упад на ЕБР во градската библиотека „Браќа Миладиновци“.
– ЛДП на 8 мај минатата година, поднесе кривична пријава до ОЈО Скопје против непознати сторители, вооружени лица вработени во МВР, поточно во Единицата за брзо распоредување, за сторени кривични дела „малтретирање во вршење на службата“, „мачење и друго сурово, нечовечно или понижувачко постапување и казнување“ и „злоупотреба на службената положба и овластување“, рече на денешната прес-конференција секретарот на Форумот на жени на ЛДП, Даница Чадиева.
Потсети дека на 5 мај минатата година во доцните часови, припадниците на МВР влегле во библиотеката „Браќа Миладиновци“ во Скопје и ги нападнале вербално, физички и насилно студентите кои биле присутни во библиотеката, со изговор дека бараат демостранти.
– Непостапувањето е кривично дело, ако се раководиме од Кривичниот закон на Република Македонија и ова е уште еден цврст доказ за потребата од Специјално јавно обвинителство, рече Чадиева.