Британскиот амбасадор во земјава, Чарлс Гарет, по вчерашото свикување на Собранието на Твитер напиша дека договорот од Пржино не е мртов.
„Не, Пржино не е мртов и закопан. Се уште е правилна рамка за одржливо решение“, напиша Гарет.
Инаку вчера на Иницијатива на ДУИ и по одлуката на Уставен суд за времено запирање на изборните дејствија, Собранието закажа седница на која се поништи датумот 5. јуни од Изборниот законик, а се констатираа и оставките на Спасовски и Ременски од министерските функции, со што Чавков и Спасов се вратија на министерските позиции. На ова опозицијата праша зошто и техничкиот премиер Емил Димитриев не се повлекува од функцијата, но тој не реплицираше на прашањето.
За денеска до Собранието е најавено дека ќе бидат доставени две иницијативи за укинување на аболицијата од претседателот Иванов за 56 лица осомничени за криминал.
Едната е на ДУИкои ќе предложат амандмани за дополнување на Законот за помилување со кои шефот на државата ќе има право да ја укине аболицијата за сите 56 лица или одделно да ја повлекува на барање на лицата што ги помилува.
Вчера пратеникот на СДСМ Петре Шилегов најави дека денеска и тие ќе поднесат иницијатива за изменување на Законот за помилување.
– Ќе видиме колку сте за, а колку против, рече Шилегов вчера од говорницата во Собранието како реплика на пратеникот од ДУИ, Џеват Адеми, кој побара од пратениците Македонци да побараат укинување на одлуката за аболиција.
СДСМ бара Законодавно-правната комисија преку автентично толкување на Законот за помилување да донесе решение дека членот 11 од Законот не постои и по таа основа Иванов не можел да донесе одлука за помилување.
Од ВМРО-ДПМНЕ повеќе пати повторија дека Претседателот на државата може да ја повлече аболицијата на барање на секое помилувано лице посебно.
Вчера, амбасадата на САД и Европската комисија во одделни изјави повторно побараа одлуката за аболиција веднаш да биде повлечена.