Министерот за внатрешни работи Митко Чавков, со разрешувањето на Примислав Димовски од шеф на полициските „Алфи“ го повредил членот 50 став 3 од Законот за кривична постапка, кој забранува разрешување и распоредување на друго работно место на истражител назначен со наредба на јавен обвинител. Министерот се соочува со кривична одговорност. Примислав Димовски се води како истражител во Специјалното јавно обвинителство, пренесе СДК чии извори потврдуваат дека никој не го прашал СЈО дали може да биде сменет истражителот Димовски од работното место и да биде распореден на друго, што е противзаконско.
ЗКП јасно вели дека секој истражител, назначен со наредба на кој било обвинител од Македонија, работи под негова контрола и наредба на истото работно место во времето кога за него била дадена наредба за истражител, сѐ додека јавниот обвинител не ја смени наредбата. Никој не смее да постапи спротивно на оваа одредба, бара Законот во член 50.
Во петокот, министерот Чавков на местото на Димовски го врати претходниот шеф на „Алфите“, аболицираниот Ивица Анчевски – Пуки. Анчевски беше главен осомничен за измачување и нечовечно постапување при апсењето на Љубе Бошкоски и главниот лик во акционата драма на видеоснимката од тоа апсење.