Твитер заедницата собира финансиски средства за помош на Здравствениот дом во Свети Николе. Катастрофално лошите услови во единствената соба која служи како дневна болница, каде што се сместуваат пациентите ги поттикна твитерџиите да соберат средства за нејзино реновирање.
Се планира од собраните средства да се купат нови чаршави, ќебиња, сталаци за инфузии, бидејќи како што велат, тие што ги има се од 70 тите години на минатиот век.
„Бев испровоциран од лошите услови во болничката соба. При приемот на близок роднина видов дека таму состојбата е катастрофална. Немаа ниту лекови за во инфузијата. Медицинскиот персонал ни рече дека ќе стават тоа што имаат во инфузијата, витамин Б6 и витамин Ц. Сакаме да собереме средства бидејќи сите сме потенцијални пациенти“, напиша на Твитер, Горан Поцков еден од организаторите на оваа иницијатива.
Директорот на Здравствениот дом, Мирче Јосев вели дека секоја донација е добредојдена иако смета дека состојбата не е толку лоша како што им оставила впечаток.
„ Добредојдена е секој донација и ја поддржувам само треба да се внимава да не се искористи во политички цели. Ние имаме чаршави, ги менуваме често. Можеби така се погодило кога дошол пациентот во моментот можеби не биле сменети чаршавите. Објектот е стар 40 години и тоа е тоа со што располагаме“, изјави за НОВА Мирче Јосев, директор на Здравствениот дом во Свети Николе.
За неколку дена од кога е почната иницијативата досега се собрани 85 франци или 110 евра, а донаторите ќе бидат транспарентно информирани за што ќе бидат потрошени парите, односно што се ќе биде набавено за Здравствениот дом во Свети Николе. Ова е линкот до сајтот за донации за секој што сака да одвои средства за помош: https://www.gofundme.com/27c24ufw
