Итно расчистување на случајот со студентката која била вработена како доктор во Итната медицинска помош и санкционирање на сите одговорни инволвирани лица кои овозможиле да таа да дава здравствени услуги и да го загрозува здравјето и животот на пациентите, бараат Група на лекари специјализанти при Медицински Факултет на УКИМ. Нивното соопштение го пренесуваме во целост.
„Групата на лекари специјализанти од Медицински факултет УКИМ изразува длабока загриженост и вџашеност од последниот скандал во јавното здравство, каде е утврдено дека недипломиран лекар бил вработен во ЈЗУ “Здравствен дом – Скопје” и самостојно, без никаков надзор давал услуги во службите за Итна медицинска помош, со што воедно била загрозена и безбедноста и животот на пациентите кои побарале услуга од оваа служба.
Овој случај ја доведува под знак прашалник функционалноста на здравствените институции и истовремено има негативен импакт фрлајќи црна дамка врз професионалноста, довербата и достоинството на целата лекарска фела.
Го повикуваме Министерот за здравство и надлежните да не го игнорираат случајот и итно да преземат мерки за негово расчистување и санкционирање на сите одговорни инволвирани лица.
Бараме и очекуваме од надлежните во најкраток можен период да дадат одговор на следниве прашања:
Врз основа на кои документи колешката била вработена во Здравствен дом Скопје со оглед на тоа што во моментот на вработување немала Уверение за завршен Медицински факултет и Лиценца за работа?
Која фирма/институција и врз основа на кои документи изготвила факсимил со титула”доктор на медицина”којшто бил користен за официјална медицинска документација?
Кои одговорни лица дозволиле колешката да се вработи и работи без надзор и самостојно да води смени и дали тие лица ќе бидат санкционирани?
Кој би преземал одговорност долку во оваа ситуација дополнително се појават и случаи со трајни оштетувања или евентуално смрт како последници од несоодветно лекување или лекарска грешка?
Во оваа прилика, длабоко разочарани, го потсетуваме Министерот за здравство дека моментално во јавното здравство работат околу 500 лекари приватни специјализанти, кои и покрај тоа што ги исполнуваат сите услови да бидат вработени согласно закон и стручност и понатаму секојдневно работат без денар плата и без пензиско и здравствено осигурување“, се вели во реакцијата на Група специјализанти при Медицински Факултет на УКИМ.