Спорот за името, признавањето на МПЦ и можностите за американски инвестиции во Македонија биле главни теми на Македонската лидерска конференција во Вашингтон.
Гостин на конференцијата на македонската дијаспора бил митрополит Методиј од Американско-канадската епархија, кој во изминатите денови имаше средби со членови на американскиот Конгрес и функционери на Стејт департментот.
– Се разбира, на овие средби го отворивме секогаш актуелното прашање признавањето на Македонската православна црква и повторно дојдовме до поентата дека всушност прашањето за признавањето на македонската црква е поврзано со прашањето на името на државата. Во САД се прилично добро запознати со историјата на тој проблем“, изјави митрополит Методиј.
Амбасадорот на Македонија во САД Зоран Јолевски зборувал за приоритетите на Македонија во контактите со САД, како што се продлабочувањето на трговските врски и подобрување на можностите за патување во САД.
– Пред 20 години веројатно во македонската дијаспора гледавме само извор на финансиски приходи, со очекувањата дека ќе испраќате пари на вашите роднини или ќе доаѓате да градите куќи во Македонија, и така очекувавме да и помагате на Македонија. Но, во ова време, најважно е знаењето кое го поседувате и вашата работна етика.
Вие сте образувани тука, имате огромни ресурси на знаење и за нас во Македонија, вашето знаење, работна етика, контактите со компаниите, универзитетите, се најголемите вредности кои може да ги искористиме, изјавил амбасадорот Јолевски.
Следната конференција на македонската дијаспора е предвидена во јули во Македонија.