Денешните протести на кои демонстрантите од Шарената револуција го искажаа револтот против еврообврзницата за задолжување на државата за дополнителни 650 милиони евра, се одвиваа во дисперзирани групи на повеќе места.
По собирот во 19 часот пред седиштето на Специјалното јавно обвинителство, под паролата „1.1 милијарди причини за крај“, демонстрантите се упатија кон Министерството за финансии, а на улицата Македонија кај поранешниот хотел Бристол, беа стопирани од огромно присуство на полиција која беше засилена со водени топови.
Оттаму толпата се раздели помеѓу комплексот Градски ѕид барајќи алтернативни приоди кон Министерството но на секој ќош беше присутна полицијата.
Помала група успеа да продре преку подземните гаражи и влезовите на зградите, а оттаму се интензивираа тензиите помеѓу полицијата и демонстрантите бидејќи во еден момент беа блокирани и тие влезови по што неколку граѓани останаа заглавени.
На поединечни страни полицијата не дозволуваше ниту премин на новинарите како протестите би биле проследени течно и новинарските екипи ќе можеа да известуваат од секој дел каде што имаше групи демонстранти.
Во турканицата со демонстрантите кои се обидуваа да ја пробијат блокадата, полицијата употреби димна бомба. Веднаш потоа, кордонот се повлече и демонстраните започнаа со шарање на фасадата на Министерството.
На едно од стаклата со кармин испишаа Лири (Слобода) а протестите завршија мирно со интонација на македонската химна од страна на присутните.