По два месеци штрајк судската администрација го стави во мирување штрајкот поради годишните одмори кога судовите не работат до средината на август. Ова не значи дека штрајкот е прекинат, сооштуваат од Синдикатот на вработените во управата и Здружението на судска администрација.
„Според Законот за судовите, годишните одмори почнуваат од 15 јули и траат до 15 август, период во кој се извршуваат само нужни работи, помалку отколку за време на штрајк, УПОЗ и ЗСА одлучија дека во овој период штрајкот ќе мирува. Но, тоа не значи дека прекинува и датумот на неговото продолжување ќе биде дополнително утврден“, се вели во соопштениетo на УПОЗ и на ЗСА.
Сепак, предупредуваат доколку штрајкувачите во меѓувреме се соочуваат со притисоци и со закани од судската власт, штрајкот веднаш ќе се активира и ќе продолжи со поголем интензитет.
На последниот состанок меѓу УПОЗ и ЗСА, како што информираат, било констатирано дека судската и извршната власт и понатаму се незаинтересирани за дијалог и за наоѓање решение за барањата на штрајкувачите.
„Судската и извршната власт со нивниот игнорантски однос кон штрајкот и кон барањата на штрајкувачите во изминатите 58 дена, како и со незаконското казнување со намалување на нивните плати од 40 отсто, создадоа невиден хаос во судовите и сакаат да предизвикаат поделеност за да го скршат штрајкот“, се вели во соопштението.