Премиерот на Турција, Бинали Јилдирим во денешно обраќање на телевизија соопшти дека претседателот на Узбекистан, Ислам Каримов починал. Неговата информација не е потврдена од узбекистанските власти, а иста вест утрово објави и новинската агенција Ројтерс, повикувајќи се на дипломатски извори.
Каримов, кој е на чело на државата од 1989 година, минатата недела беше пренесен во болница откако претрпе мозочен удар, но неговото здравје се чуваше како државна тајна.
Засега нема информација кој би бил наследникот на чело на државата бидејќи опозицијата се смета за нелегална во оваа земја а медиумите имаат многу мал пристап до информaции бидејќи се контролирани од државата.
– Претседателот на Узбекистан почина. Ние ја споделуваме болката со узбекистанскиот народ, нека почива во мир, порача Јилдирим на состанок пренесуван во живо во Турција.
Јавноста последен пат го виде Каримов на 17 август.
Од друга страна и руски вебсајт близок до опозицијата, Фергана, објави дека во родниот град на Каримов, Самарканд, се прават подготовки за неговиот погреб, а аеродромот во градот бил затворен за летови за утре.