Специјалната јавна обвинителка Катица Јанева да се извини и да ја повлече изјавата дека Собрание е нелегитимно, да се врати на комисиска расправа и да достави целосен финансиски извештај за своето работење.
Ова од обвинителката го побара координаторот на пратеничката група на ВМРО-ДПМНЕ Илија Димовски, откако Јанева по неколкудневниот притисок од владејачкото мнозинство одлучи повеќе да не се појавува на комисиска расправа за Извештајот на СЈО во Собранието.
Според Димовски, Јанева е должна да поднесува извештаи, да присуствува и да ги образложува пред Собранието на Република Македонија .
-Доколку СЈО и госпоѓата Катица Јанева не постапат во согласност со Уставот и законите, сакаме да потенцираме дека пратеничката група на ВМРО-ДПМНЕ и Коалицијата за подобра Македонија воопшто нема да прифати разгледување на било какво барање и предлог од страна на СЈО, рече Димовски.
На новинарско прашање дали ВМРО-ДПМНЕ се спремни да ги прифатат барањата на Јанева доколку обвинителката се извини, Димовски вели дека дел од барањата на СЈО се неуставни и надвор од она што е договорено при формирањето на Обвинителството.
Јанева досега во неколку наврати апелираше Собранието да прифати измени во Законот за заштита на сведоци и Законот за приватност, да се почитуваат препораките на Венецијанската комисија и да се продолжи мандатот на СЈО
Шестмесечниот извештај на Јанева четири дена беше на дневен ред во Комисијата за политички систем. По матаронските говори на пратениците од власта пропратени со навреди и дискредитации за обвинителката, Јанева демонстративно ја напушти седницата нарекувајќи ја класичен мобинг и соопшти дека ќе се појави само на пленарна седница.
Според координаторот на пратеничката група н СДСМ Горан Сугарески, целта на власта билада го заштити од пратенички прашања државниот обвинител Марко Зврлевски чиј Извештај е втра точка на девен ред во Комисијата.
-ВМРО-ДПМНЕ не сакаат Извештајот на Зврлевски да дојде ниту на Комисија ниту на пленарна седница. Ако го гледаме редот на нештата и како се организирани јавните обвинителства во Република Македонија, по секоја логика требаше Извештајот на Марко Зврлевски да биде на прва точка, а втор да биде Извештајот на СЈО. И без претставник извештаи може да се гледаат во Собранието, меѓутоа ВМРО-ДПМНЕ Деловникот го толкува поинаку. Мој став е да не очекувате пленарна седница, затоа што ова е алиби за никогаш да не се дојде до пленарна седница, рече Сугарески.
Извештаот на Јанева останува на дневен ред во Комисијата. Претседателот Владимир Ѓорчев денеска седницата ја затвори за 5 минути, поради, како што рече деловните пречки таа да се одржи, односно поради отсуството на Јанева. Најави продолжение на седницата утре, иако обвинителката Јанева децидно рече дека повеќе нема да се појавува.