Политичко и економско влијание од секое село така што ќе стане општина предлага лидерот на ВМРО-НП, Љубчо Георгиевски.
– Сакаме да пласираме системско политичко решение кое ќе донесе промени на многу нешта во Македонија. Секое село може да стане општина, да се направи тотална децентрализација. Верувам дека оваа провокација ќе биде прифатена од многу структури, изјави денеска Георгиевски на прес-конференција.
Тој смета дека со мерката која ја предлага ВМРО Народна партија, ќе се реши проблемот со иселувањето на луѓето од селата во градовите и во странство, посочувајќи ја општина Центар, која вели не сака да и се прави она што сега и се правело.
– Оваа инцијатива ќе ја врати желбата на граѓаните да работат во своите родни места. Подобро да ги вработуваме во селата отколку да се полни администрацијата во Скопје. Овој модел функционира во цела Европска Унија, а кај нас ниедно село нема жиро сметка. Оваа промена е решение за многу проблеми, рече Георгиевски меѓу другото.
На истиот начин, лидерот на ВМРО-НП смета дека ќе се релаксираат и меѓуетничките односи.
Зборувајќи пак за предизборните коалиции, Георгиевски вели дека во најблиска соработка биле со партиите од десниот блок, дека контактираат и со СДСМ, но имал чувство дека Социјадемократскиот сојуз се откажал од идејата за голема коалиција.
На прашањето дали ќе има избори на 11 декември, Георгиевски вели дека неговата партија е во подготовки, а овој проект би влегол во нивната изборна програма.
Лидерот на ВМРО-НП на прес-конференцијата повторно ја повтори поддршката за специјалната обвинителка Катица Јанева и рече дека во интерес на сите е да се знае кој преслушувал пред да се одржат изборите.