Алберт Буњаку вели дека ја избришал последната буква и така успеал да избега во Шведска од војната во Југославија во 1991 година
Селекторот на фудбалската репрезентација на Косово, Алберт Буњаку со интересна исповед пред дуелот против Хрватска во Скадар во квалификациите за Светското првенство во Русија во 2018 година. За време на мечот во Скадар тој истакна дека го сменил презимето со бришење на последната буква со цел да избегне покана од ЈНА, одење во Вуковар и бегање од Југославија во 1991 година. И, како што вели, успеал во тоа и завршил во Шведска.
„На сите ни беше јасно што се случува. Ќе требаше да одам во Вуковар, но си реков „Не, ти нема да пукаш на луѓе. Бегај од тука“. Така и сторив и избегав од државата“, открива Буњаку.
Буњаку е роден во Приштина во 1971 година. Во 1991 година, како член на истоимениот клуб од неговиот роден град, добил покана за служење на воениот рок. Притоа тврди дека за избегнување на обврската кон ЈНА добил затворска казна од 20 години од тогашните државни органи.
„Јас сум Буњаку. Со „у“ на крајот на презимето. Но, морав да го избришам пред 25 години за да избегам од Југославија. За секој случај, ја изоставив последната буква да не можат да ме најдат“, посочува косовскиот селектор и продолжува:
„Видете, ова се случуваше во 1991 година. Јас студент, па и фудбалер. Стигна поканата од ЈНА и знаев што може да ме очекува. Не сакав ни да помислам дека би можел да завршам во Вуковар. А, војната веќе траеше“.
Колку има вистина во ваквите негови искази знае само тој. Никој не може да тврди дека се веродостојни, но никој не може да оди и во спротивен правец со оглед на хаосот во тој период. Многумина, сепак, се сомневаат дека Буњаку со ова сака да се додвори на Хрватите пред натпреварот во Скадар каде во септември гостуваше и фудбалската репрезентација на Македонија, но на Албанија. Интересот за првиот настап на Косоварите во официјален меч на „домашен терен“ е огромен. Информациите од Албанија велат дека билетите за натпреварот биле распродадени за неколку часа.