Со евентуална победа и кикс на Исланд против Украина, тогаш сонот за Полска ќе стане јаве
Македонската репрезентација за фудбалери до 21 година е пред историски момент да стане прв наш национален тим што успеал да се пласира на Европско првенство. За тоа е потребна победа попладнево против Шкотска во последното квалификациско коло. Ако желбата се оствари, а во меѓувреме се поклопи и со онаа во Рејкјавик што се однесува на кикс на Исланд против Украина, во тој случај „надежната“ генерација на селекторот Благоја Милевски ќе биде во прва во групата, позиција што носи и привилегија за директен пласман на завршнниот турнир во Полска.
Во случај, пак, на победа и на Исланд, Македонија ќе биде втора во групата и ќе оди во бараж. Она што, сепак, е најважно е да се заврши својот дел од задачата. Тоа е освојување на три бода за што и публиката треба да даде придонес, да дојде во што поголем број и да биде 12 играч на младите македонски репрезентативци кои во досегашните девет настапи и покажаа и докажаа дека заслужуваат и внимание и ветар во грб од трибините на националната арена.
„Верувам дека ќе бидеме на исто ниво како и во претходните мечеви. Најважен за мене е фактот што сите фудбалери се здрави и мотивирани за победа. Промени во играта не планирам, ниту во поставеноста што не е случај со Шкотска. Имаат доста промени во ростерот и настапот против нас во првиот меч“, рече селекторот Благоја Милевски на денешниот брифинг со новинарите.
Притисок, вели Милевски, нема. Пристапот на подготовките бил максимално сериозен и професионално е одговорено во работата. Притоа повтори дека без оглед на конечиот исход, идните сениорски репрезентативци веќе се надминаа со демонстрираниот квалитет, менталитет и професионализам и најавија светла иднина.
„Важно е како ќе одиграме ние. Она што мора е максимално залагање. Другото, верувам, ќе дојде само. Ако го сториме тоа, на крајот ќе видиме дали било доволно за победа. Мора да одиграме бидејќи ако се надеваме на среќа, нема ништо да направиме. Не велам дека е непотребна меѓутоа велам дека приориет е да ја завршиме работата што е до нас. Со калкулации не се занимаваме ниту правиме“, потенцира Милевски.
Дуелот меѓу младите репрезентации на Македонија и Шкотска утре попладне на арената „Филип Втори“ со почеток во 18,45 часот. Во истиот термин во нашата група, Исланд ја пречекува Украина во Рејкјавик, а Северна Ирска во Белфаст е домаќин на Франција.