Ако Хилари Клинтон стане претседателка на САД а со тоа и прва жена во Белата куќа, како ќе го викаме нејзиниот сопруг Бил Клинтон?
Белгиската агенција Белга денес посветува голем простор на ова прашање и обидот за одговор.
САД досега немале жена претседател и никогаш еден маж не влегол во Белата куќа како сопруг на претседателка. Но фактот што станува збор за Клинтонови отвора уште еден проблем – никогаш досега еден екс претседател не бил оженет за претседателка.
Белга разговарала со повеќе аналитичари. Титулата First Gentleman природно се наметнува додека називите First man или First husband се неприкладни.
Според Лиза Гротс, експерт за титули, во САД има шест жени гувернерки и нивните мажи ја носат титулата First Gentleman.
Но работата ја комплицира фактот што Бил Клинтон бил претседател на земјата помеѓу 1993 година и 2001 година. Поранешните претседатели ја чуваат титулата до крајот на животот, објаснува Алида Блек од Историското здружение на Белата куќа.
Оваа историчка вели дека според протоколот Клинтонови ќе бидат презентирани како “претседателот Клинтон и поранешниот претседател Клинтон.
“Слично беше и со Буш. Имавме претседател Буш и поранешен претседател Буш кога синот и таткото се појавуваа заедно”, објаснува таа. Џорџ Буш беше 43 претседател на САД а неговиот татко беше 41 претседател.
Ако Хилари биде избрана протоколот на Белата куќа ќе треба заедно со брачниот пар Клинтон да договори како да се именува канцеларијата на Првата дама, вели Блек.
“Ако таа беше мажена за човек кој не бил претседател тогаш тој ќе беше Прв џентлмен. Но Бил Клинтон е поранешен претседател и не може да носи титула Прв џентлмен бидејќи тоа е понизок ранг од рангот претседател. Таа тврди дека брачниот пар ќе мора да најде решение за овој проблем.
Бил Клинтон е активен во претседателската кампаза но тој нема да може да работи ниту да биде платен од администрацијата ако се врати во Белата куќа. Историчката вели дека тоа не е легално. Но г-ѓа Клинтон може да му довери некоја мисија која не е официјална и не е платена како што Бил направи за Хилари, кога таа беше Прва дама и и даде мисија во областа на здравственото осигурување.
Традицијата налага Првите дами, кои имаат свој шеф на кабинет и персонал, да работат на некоја област која им одговара и која не може да биде предмет на полемика. Така Лаура Буш работеше на образование а Мишел Обама на градинарство, поранешните борци и проблемот со дебелината на населението.
Но Бил Клинот е политичар и нема да се задоволи со протоколарна улога.
Некои критичари велат дека тој не може да се вика Прв џентлмен со оглед на неговите авантури со жени па не е достоен за оваа титула.
Засега Бил не прифаќа никаков платен ангажман како говори кои на пример во 2015 година му донесоа милиони долари, тврди НБЦ. Тој исто така го напушти Советот на Фондацијата Клинтон која што тој самиот ја основа кога ја напушти Белата куќа.