Претставата „Лола“ во режија на Софија Ристевска за прв пат ќе биде изведена во Македонија на 11 мај, во 22 часот во клубот „Џубокс“ во Скопје .
Монодрамата во која младата актерка Македонка Илиевска ја толкува носечката улога, премиерно беше одиграна во јануари, годинава, на фестивалот „Knots“ во градот Сан Педро, Аргентина.
Проектот е продукција на македонскиот независен театар Intimate-Theatre, кој што Ристевска и Илиевска го претставуваа во Аргентина на интернационалниот собир на театарџии, каде што беа единствените учеснички од Македонија.
Покрај премиерата во сабота веќе се закажани уште пет изведби на 12, 13, 14, 15 и 16 мај.
„Лола“ е работена според вистинити приказни, обработени од режисерката Ристевска, а кореографијата е на Кире Миладиноски.
„Иако непишаното правило за една претстава е прво да биде поставена дома па дури потоа да тргне на интернационалните сцени, ние одлучивме нештата да ги превртиме наопаку. „Лола“ за прв пат ја видоа аргентинските гледачи, почнавме во градот Сан Педро, а сега продолжуваме во нашата татковина.
Лола е претстава за гладот и смртта. За либералниот капитализам во кој сè повеќе луѓе се гладни, а сè повеќе корпорации се богати.
Тоа е историја за животот на една жена, која се обидува да преживее во време на економска, политичка и духовна криза. Тоа е приказна за погрешните животни избори и за многуте компромиси што таа жена ги прави, со единствена цел, да не биде гладна.
Тоа е претстава за удобностите што ги носат нелегалните пари и за данокот што потоа го земаат…
Лола е претстава за убиства и секс. Се работи за приказна за преживувањето во општествен систем, каде што се умира од физички и емоционален глад“, вели режисерката Ристевска.