Комитетот на Обединетите нации за елиминација на дискриминација врз жените (ЦЕДАВ) ја повика македонската влада да обезбеди итно сместување и нега за две бремени жени Ромки, кои во текот на летото станаа бездомнички, токму поради македонските власти, велат од Европскиот центар за права на Ромите со седиште во Бумипешта. Тие ги преставуваат Ромите кои беа иселени од импровизираните куќи под Кале, каде што живееја во изминатите девет години.
Од Европскиот суд за човекови пак, права добиле одлука да се покрене брза постапка за случајот на 53 Роми и да се испрати итно известување до македонската Влада.
Комитетот на ОН одговорил на жалбата поднесена во име на жените од страна на Европскиот центар за правата на Ромите(ЕРРЦ).
Ромките заедно со нивните семејства беа иселени без соодветна постапка или консултација и спротивно на меѓународните обврски што ги има Македонија во однос на инклузијата на Ромите, велат од ЕРРЦ.
„Со иселувањето, жителите на населбата беа оставени на улица додека беа поплавите, без пристап до вода и електрична енергија. Со опаѓањето на температурата и влошувањето на временските услови, овие бремени жени, кои се тинејџерки, се соочени со ризикот да го поминат нивното последно тромесечје од бременоста во студени шатори и импровизирани засолништа покрај патот. Властите не направија вистински напор за да обезбедат домување за иселените луѓе. На некои од нив им беше понудено место во прифатен центар кој е веќе преполн, додека пак на други, вклучувајќи ги и овие жени, не им беше понудено ништо, затоа што како и голем дел од Ромите во Македонија, тие немаат документи за идентификација“, велат за НОВА од ЕРРЦ.
„Ова ми е прва бременост. Очекувам бебе за три месеци, но немам здравствено осигурување и немам средства за прегледи. Претходно, барем имавме куќа и имаше пумпа за вода, а сега е многу тешко, затоа што сме на отворено и времето е многу ладно, особено навечер“, вели една од бремените жени за ЕРРЦ.
Ова барање од Комитетот на ОН, го зајакнува повикот на ЕРРЦ за итно и нужно сместување на жените, додека пак останатите Роми од населбата продолжуваат да се борат пред Европскиот суд за човекови права (ЕСЧП) против нивното присилно иселување, велат од организацијата. Од Европскиот суд за човекови права пак, добиле одлука да се покрене брза постапка за случајот на Ромите кои беа иселени од живеалиштата и да се испрати итно известување до македонската Влада.
Минатиот месец, 53 Роми кои беа иселени од нивните живеалишта, побарале помош од ЕРРЦ, кој покренал итна постапка. Судот испратил итно известување до македонската влада да одговори за незаконското и присилно иселување на Ромите.
Од ЕРРЦ велат дека го поздравуваат брзиот одговор на Комитетот на ОН и дека внимателно ќе ги следат настаните за да видат дали македонските власти ќе реагираат на тоа.
„Присилните иселувања на Ромите претставуваат криза и без сомневање, тоа е расистичка криза. Ромите се истуркани да живеат на маргините, а потоа се туркаат уште подалеку. Овој случај ги покажува реалните последици за бремените жени и нивните семејства. Драго ми е што Комитетот на ОН сериозно го сфаќа ова прашање. Но, македонските власти треба да знаат дека и ние сме сериозни, исто така. Со секој ден што не реагираат, тие само ги влошуваат нивните неуспеси и ние нема да запреме сè додека не обезбедиме правда за овие жени и за останатиот дел од заедницата“, вели Ѓорѓе Јовановиќ претседател на ЕРРЦ.
Во исто време, ЕРРЦ ќе продолжи да ги претставува жените пред Комитетот на ОН, за признавање на нивното право на репродуктивна здравствена нега, правото на соодветни услови за раѓање и одгледување на нивните деца и правото на недискриминација.
Европскиот Центар за Правата на Ромите(ЕРРЦ) е водечка меѓународна правна организација од јавен интерес која што е вклучена во низа на активности во борбата за спречување на расизмот против Ромите, како и повреда на човековите права на Ромите.