Кривичниот совет од Основниот суд Скопје 1 денеска одржал седница на која одлучил да ја одбие жалбата на СЈО за определување на мерки за претпазливост за три лица осомничени во случајот „Трезор“.
„Кривичниот совет на Одделението за организиран криминал и корупција при Основниот суд Скопје 1 – Скопје постапувајќи по жалбата на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите (СЈО) против решението на судија на претходна постапка од 04.11.2016 година за определување на мерки за претпазливост против три лица опфатени во предметот на СЈО во јавноста познат како „Трезор“ на одржана седница денеска донесе решение со кое решението на судијата на претходната постапка се потврдува и жалбата на СЈО за определување мерки на претпазливост за сите три лица се одбива како неоснована“, пишува во соопштението на судот.
Во случајот „Трезор“ три раководни лица од Управата за безбедност и контраразузнавање и едно од МВР се товарат дека проневериле државни пари за лично богатење.
Во истражната постапка, според обвинителката Фатиме Фетаи, било утврдено дека четрвтоосомничениот вработен во МВР им помогнал на првите тројца осомничени, раководни лица од УБК, да ѝ овозможат на компанијата „Финзи“, со која управувал сега починатиот Коста Крпач, да оствари имотна корист во вредност од 862.045 евра.