Во Здравствениот дом во Скопје минатата недела се вработени 50 нови лекари и медицински сестри. Тие се распоредени да работат во Итната медицинска помош, домашна посета и ноќната служба. Дел од нив се луѓе кои веќе волонтирале за хонорар, но има и нови вработени, дознава НОВА од свои извори во Здравствениот дом. Вработувањето на овие луѓе се случува непосредно пред изборите, иако со почетокот на кампањата има забрана за нови вработувања.
Во Здравениот дом на Скопје признаваат дека има нови вработувања, но велат дека огласот на докторите и медицинските сестри бил објавен пред да бидат распишани изборите.
„ ЈЗУ Здравствен дом на Скопје огласот за вработување на доктори на медицина и медицински сестри за потребите на Службата за Итна медицинска помош со домашно лекување го објави и целата постапка ја заврши со донесување на Одлуки за избор на кандидатите, пред распишувањето на изборите“, се вели во одговорот на менаџерскиот тим на Здравствениот дом, Скопје.
Од таму потенцираат дека, почитувајќи ги одредбите од Законот за спречување на корупцијата, побарале и добиле позитивно мислење од Државната комисија за спречување на корупцијата за пријавување на избраните кандидати во Агенцијата за вработување.
НОВА побара одговор од Државната комисија за спречување на корупција дали до нив е доставено барање за одобрување, односно позитивно мислење на новите вработувања во Здравствениот дом. По кусата преписка, добивме краток одговор дека тие имаат дадено свое мислење, но одговорноста во почитување на законите е на самата институција.
„До ДКСК има пристигнато повеќе барања на мислење од областа на здравството по кои Државната комисија дала мислење, односно одговорила на сите пристигнати барања. Доследното почитување на посочените закони е во надлежност на самите институции“, велат во Државната комисија за спречување на корупцијата.
Новите вработувања на лекари медицински сестри во брзата помош, домашната посета и дежурните служби, кои се случуваат по еден месец од објавување на огласот, предизвикаа негодување меѓу вработените и се толкуваат како обид на власта на да добијат повеќе сигурни гласачи на изборите.