Со седум филмови во режија на хрватските режисери Бранко Бауер и Ватрослав Мимица, Хрватската кинотека од 15 мај до 21 мај ќе гостува во Кинотека на Македонија.
Причина за посетата на хрватските филмови на македонското платно е реставрацијата на македонските филмови „Македонски дел од пеколот“ снимен 1971 и „Три Ани“ од 1959, во режија на реномираните хрватски режисери Мимица и Бауер, кои имаат третман на филмско наследство и во двете држави.
Циклусот ќе го отвори „Македонски дел од пеколот“ утревечер со почеток во 20 часот, а ден потоа ќе се прикаже „Хранетиот“, исто така во режија на Мимица. Од овој режисер ќе се прикажат и „Каја, ќе те убијам!“ од 1967 и „Прометеј од островот Вишевица“ од 1964, додека Бауер е застапен уште и со „Лице во лице“ снимен 1963 и „Не свртувај се сине“ од 1956 година.
„Македонски дел од пеколот“, „Хранетиот“ и „Каја, ќе те убијам!“ наративно се однесуваат на ист временски период, Втората светска војна, иако основните мотиви, разработката, како и крајната порака им се различни.
„Ќе забележите дека актерскиот состав на речиси сите филмови е од мешан тип, односно дека присутни се имиња од сите простори на поранешна Југославија, а истото важи и за составот на филмските екипи што било сосема нормално, очекувано и поттикнувано во времето на југословенските копродукции, соработки и размени“, велат од Кинотека.
Еден ден подоцна, циклусот „Мимица Бауер“ ќе биде прикажан и во Центарот за култура во Битола. Гости на Кинотеката на Македонија ќе бидат директорот на Кинотеката на Хрватска, Кармен Лотка и филмолозите Младен Буриќ и Луција Зоре, кои ќе зборуваат за овие големи авторски имиња кои оставиле длабоки траги и во македонската кинематографија.
По проекциите на филмовите на Мимица и Бауер во Скопје и во Битола, следува претставување на македонската кинематографија во Загреб и во Сплит во септември.