Новиот филм на македонскиот режисер Игор Иванов Изи „Соба со пијано“ ќе го отвори 34. издание на Фесивалот на филмска камера „Браќа Манаки“, кое годинава ќе трае од 14 до 20 септември.
Покрај „Мајки“ и „Трето полувреме“, „Соба со пијано“ е трет македонски филм во
последните четири години што ја има честа да се прикаже на свеченото отворање.
Цело време настојувавме да создадеме традиција, не само да ги прикажеме
домашните наслови, туку и да ги добиеме премиерите на најважните македонски
филмови. Од година во година, задачата стана сѐ полесна да се реализира.
Самото тоа веќе доволно говори колкаво значење има Фестивалот во очите на
нашите автори. И овојпат ќе се обидеме на црвениот тепих во Битола да ја
пречекаме целата филмска екипа на „Соба со пијано“ и да имаме подеднакво богато
издание – вели директорката на Фестивалот, Лабина Митевска.
И режисерот Иванов, на прес конференцијата, денеска, откри детали за својот нов филм
– Среќен сум што македонската премиера, во духот на традицијата, ќе се случи на
најстарото и највредното интернационално филмско случување, фестивалот
„Браќа Манаки“. Оваа студија на епизодни карактери, поместена на единствена
локација е огледало на сета хипокризија, апсурд и на сета декаденција на
генерацијата на која _ припаѓаме и искрено верувам дека со сопствената
актуелност, естетска рамка и со уникатноста ќе успее да допре до различните
генерациски, социјални и културни нивоа на македонската кино-публика.
„Соба со пијано“ обединува извонредна интернационална авторска и актерска екипа на која сум бескрајно благодарен на безрезервниот влог во проектот, особено во
доменот на актерската игра, на фотографијата и на музиката, кои на проектот му
овозможуваат вонредна артистичка и продукциска вредност – рече Изи.
Беше презентиран и годинашниот креативен изглед кој повторно е реализиран од маркетинг агенцијата Футура 2/2. Држејќи чекор и со традицијата и со иновацијата, Фестивалот врти нова страница во својот креативен идентитет, којпродолжува со мотото „Пушти ја светлината“. Целокупниот дизајн е инспириран од играта со светлината, што е клучот и на кинематограферската уметност.
– Светлината е главната алатка на секој кинематографер. Светлината е магијата
на филмското платно, двигател на подвижните слики. Поради тоа се одлучивме
ова мото да го носи најстариот филмски фестивал посветен на
кинематограферската професија. Заедно со Футура 2/2, оваа година се обидовме
да донесеме една свежина, оригиналност, топлина, еден уметнички исказ во
решението на плакатите и на целото визуелно осмислување на Фестивалот –
рече директорката Митевска.
„Соба со пијано“ е приказ на различни животни судбини доведени на оваа единствена локација од чиј ракурс можат да се допрат најсуштествените аспекти на нашето постоење. Фрагментите од животите на овие „егзистенцијалистички“ карактери се сосем доволни пред нашите очи да истече целиот нивен животен пат. Мотивите се претвораат во фрустрации, амбициите и мечтите водат кон пропаст. Иако нималку слични, претставници на сосема различни социјални и културни групи, овие ликови се обединети во бесмислата на животот.