Марк Селби по вторпат во кариерата го освои британскиот снукер шампионат што се играше во „Барбикан центар“ во Јорк. Еден од најзначајните турнири се играше за награден фонд од 850.000 фунти од кои 170.000 ќе добие новиот победник.
Селби, актуелен број еден во светот, и О’Саливен, според многумина најдобриот снукерист на сите времиња, одиграа финале што во целост ги оправда очекувањата. Пресметката за тронот на двајцата фантастични играчи беше задоволство да се гледа. На крајот Селби, сосема заслужено, победи со 10:7 во фрејмови (партии).
О’Саливен почна одлично, со трицифрен брејк (124) и по три фрејма имапе водство со 2:1. Одговорот од Селби допрва следуваше. До крајот на првата сесија нанижа пет фрејма за убедливи 6:2. Следуваше и нов за 7:2 меѓутоа неговиот противник немаѓе намера така лесно да се предаде ниту, пак, големиот минус го демотивира. До паузата од 15 минути успеа да намали на 7:5. По враќањето, Селби возврати со трицифрен брејк (137) и поведе со 8:5 за наредните два да ги добие О’Саливен кој се доближи на само еден фрејм (8:7).
Селби со трицифрен брејк (130) се впушта во ново резултатско „бегство“. Притоа си обезбеди три меч топки пришто ја искористи првата и во голем стил, со нов брејк (107), го осигура шампионскиот трофеј.
О’Саливен по третпат во сезоната губи финале што воедно беше и негов прв пораз во шесте досегашните настапи во легендарниот „Барбикан центар“ во Јорк.