Изборите се важен чекор за решавање на кризата а на СЈО мора да му се овозможи да работи и понатаму непречено за откривање и казнување на злоупотребите на власта, порачува германскиот минстер за надворешни работи, Франк-Валтер Штајнмајер.
Во реакцијата на германското МНР по изборите во Македонија, објавена од Дојче Веле, се вели:
„Вчерашните избори во ПЈРМ се важен чекор за решавање на долготрајната политичка криза во земјата. ОБСЕ, кој процесот од почеток го следеше со бројни изборни набљудувачи и опсежна техничка поддршка, во целина зборува за мирен изборен тек.
Сега е важно брзо да се формира влада, која својот мандат ќе го користи за забрзување на итните реформи. Во областа на правната држава и судството, јавната управа, како и во слободата на медиумите и мислењето, на земјата ѝ се потребни брзи и убедливи резултати. Специјалното јавно обвинителство мора да може и натаму да работи непречено во откривањето и казнувањето на злоупотребите на власта и службената положба.
Ова е предуслов за граѓаните повторно да стекнат доверба во институциите на својата држава. Само на таков начин ќе се овозможи забрзување на евроатлантското приближување на земјата“, се вели во реакцијата на германското МНР со кое раководи Франк-Волтер Штајнмајер.