И покрај планираната евакуација на цивилите од бомбардираните области во источно Алепо, засега никој нема излезено, соопштува Сиријската опсерваторија за човекови права. Автобусите останале заглавени пред да започне самата евакуација.
Според активистите внатре во градот, додека цивилите чекале, и натаму атмосферата била тензична и се пукало.
Прекршен е договорот за примирје помеѓу приврзаниците на Башар Ал-Асад и бунтовниците кој беше постигнат во вторникот, а првата група цивили со 150 луѓе од кои 70 повредени, требаше да биде изнесена утрово.
Активистите објаснуваат дека секој кој се поврзува со бунтовниците која е против војската на Асад, буквално „се лови“. „Секој час се одвиваат кланици“, објавува Сиријската опсерваторија за човекови права.
Амбасадорката на САД, Саманта Пауер зборувајќи на итниот состанок на Советот за безбедност при ОН, се обрати кон сиријските, иранските и руските колеги.
„Сносите одговорност за овие злодела“, им порача таа на своите колеги по информациите дека во источно Алепо се убиваат жени и деца.
„Кога еден ден ќе дојде пресметка за извршениот хорор во Алепо, а ќе дојде тој ден порано или подоцна, нема да можете да се оправдате дека не сте знаеле што се случува“, рече Пауер.
А никој не го знае точниот број на заглавени или убиени цивили. Сиријската влада засега нема потврдено информација, додека генералниот секретар на ОН, Бан Ки-мун потенцираше дека бројот на заглавени цивили може да е илјадници.
Од друга страна Министерството за одбрана на Русија во соопштение напиша дека им помогнале на најмалку 100.000 цивили да го напуштат градот, меѓу кои 40.484 деца, а дале и 78 тони хуманитарна помош.