Турскиот премиер Бинали Јилдирим најави дека Парламентот на Турција неделава ќе одржи седница на која ќе расправа и гласа за продолжување на вонредната состојба во земјата за уште три месеци.
Вонредната состојба во Турција беше прогласена по обидот за пуч на 15 јули. Одредбите од правилата за вонредна состојба и овозможија на Владата да носи закони без одобрение од Парламентот, како и да ги ограничува или суспендира правата и слободите на граѓаните доколку процени дека тоа е неопходно.
Врз основа на ваквите права, властите во изминативе шест месеци уапсија и отпуштија од работа десетици илјади лица.
Најавата за продолжување на вонредната состојба за уште три месеци, доаѓа по нападот на новогодишната ноќ во Истанбул, при што беа убиени 39 лица. Одговорност за нападот презеде групата Исламска држава (ИД).