Селекторот Лино Червар со помешани чувства по поразот на Македонија од Шпанија со 25:29 во четвртото коло на ракометниот мундијал во Франција. Од една страна изрази задоволство од играта на репрезентативците, од друга страна изрази незадоволство од начинот на кој литванските арбитри ја делеа правдата, особено во второто полувреме кога „фуријата“ ја направи и предноста во конечниот триумф.
„Немам што да им забележам на моите ракометари освен да им упатам честитки за играта во првото полувреме. Тотално ги надиграа Шпанците, а најдоа простор и за атракции. Но, имам забелешки за судиите. Ние сме мала земја, немаме доволно играчи за ротирање меѓутоа мислам дека тие немаа ист критериум во вториот дел. Ова е нивна победа, им го кажав тоа и за време на мечот“, рече хрватскиот предводник на „црвено-жолтите“.
Червар признава дека и Македонија грешеше во второто полувреме што само одеше во прилог на ситуацијата на терен што ја забележува.
„Наместо пробивање, тие судат пенал, наместо престап, тие признаваат гол, нам не ни досудија пенал. Беше страшно тешко да се игра. Многу сум задоволен што, сепак, одигравме квалитетно, покажавме борбеност, дадоа максимум. Ништо. Одиме понатаму. Мора да се одмориме, да подготвиме тактика и да видиме што можеме да поправиме за краткото време до мечот со Исланд“, дополни македонскиот кормлар.
Дуелот со Исланд е попладнево од 17,45 часот и директно ќе решава за третото место во групата Б и која репрезентација ќе оди на Франција, а која на Норвешка во осминафиналето