Од сајтот на Белата куќа исчезна шпанскиот јазик. Министерот за надворешни работи на Шпанија Алфонс Дастис изрази жалење што шпанскиот јазик веќе го нема на сајтот на новиот претседател на САД Доналд Трамп.
“Жалиме што шпанската верзија од сајтот е избришана и сметаме дека тоа не е добра идеја”, рече Дастис на прес конференција.
Во САД 56,6 милиони луѓе се со хиспанско потекло што претставува 17,6 отсто од населението. Ова е најбројното малцинство во САД а околу 40 милиони луѓе зборуваат шпански во своите семејства.
И шпанскиот министер за образование смета дека токму од овие причини не е добра идеја да се тргне шпанскиот јазик од сајтот на Белата куќа. Според него, познавањето на повеќе јазици е богатството на едно општество и на една нација. САД е втората земја во светот во која живеат најмногу хиспанофони. Првата е Мексико.
Сајтот на шпански на Белата куќа го воведе администрацијата на Обама во 2009 година.
За време на кампањата Трамп вети дека ќе се бори против имиграцијата од Латинска Америка. Во кабинетот на Трамп нема ниту еден министер со хиспанско потекло што е се случува за прв пат во последните 30 години.