Интернационалниот олимписки комитет (ИОК) денеска објави дека двајца атлетичари се дисквалификувани од Олимписките игри во Пекинг во 2008 година.
Неста Картер (31), кој беше дел од штафетата на Јамајка што истрча до злато во финалето на 4×100 метри, е дисквалификуван од Олимписките игри во Пекинг. Повторната анализа на примероците од таа Олимпијада покажаа дека тој бил позитивен на забранетата супстанца метилхексанеамин.
Дисциплинската комисија на ИОК ја донесe следната одлука:
Атлетичарот Неста Картер користел допинг и е дисквалификуван од трката 4×100 на Олимпијадата во 2008 година. Тимот на Јамајка е дисквалификуван од истата трка, на која освои златен медал. Медалите и дипломите ќе бидат вратени.
Од Интернационалната атлетска асоцијација (ИААФ) е побарано да ги смени резултатите поврзани со конкретната трка и да преземе натамошни мерки кои се во нејзина надлежност.
Олимпискиот комитет на Јамајка треба да ги врати медалите и сите признанија од ИОК кои се однесуваат на спорната трка. Одлуката стапува на сила веднаш.
Со оваа одлука најбрзиот човек на светот, Усеин Болт, останува без троен хет-трик, односно три златни медали на три Олимпијади во низа. Тој во Пекинг освои 3 злата – на 100 метри, на 200 метри и на 4×100 метри. Истото го стори и во Лондон и на последната Олимпијада во Рио, каде освои злато во истите дисциплини.
Втората атлетичарка која е дисквалификувана е Татјана Лебедева (40) од Русија која се натпреваруваше во трискок пришто на истата Олимпијада во Пекинг го освои сребрениот медал. Повторната анализа на резултатите покажа дека таа била позитивна на туринабол.
И за овој случај, ИОК го обврза Рускиот олимписки комитет да го врати медалот.
