Политичари, министри, пратеници, архитекти, врвот на МПЦ, професори, уметници актери, дојаени на македонскиот театар, денеска дојдоа да видат како изгледа новиот театар. Сите тие на црвениот килим ги пречекуваше директорот на МНТ Дејан Лилиќ, заедно со режисерот Дејан Пројковски.
Новиот театар денеска беше само делумно отворен, со обраќање на премиерот Груевски и на министерката за култура Канчева Милевска и со изведба на фрагменти од повеќе претстави на Македонскиот народен театар и од претставата „Вечната куќа”, по текст на Јордан Плевнеш, со која во септември ќе биде отворена театарската сезона.
Во театарот има и 46 скулптури. Централната, поставена на главниот влез, ги претставува основоположниците на македонсиот театар. Големата сцена има 724 седишта, а малата – 215. Театарот завзема површина од 7 200 метри квадратни.
За барокната орнаментика на театарот бил задолжен тим од десетина уметници и историчари на уметноста предводени од Елизабета Димитрова од Факултетот за историја на уметност и од уметникот Ѓорѓи Чулаковски- Ѓото.
Под раководство на проф. Јелена Лужина, во театарот е поставена поставка која ја прикажува историјата на македонската театарска уметност.
Таа на отворањето го носеше прстенот на Петре Прличко, за да го оживее уште еднаш на сцената, како што рече.
Според податоците од Бирото за јавни набавки, театарот чини 39 милиони евра. Од кои за скулптури на фасадата и партерот се потрошени речиси 580 илиади евра.
За завесата во овој театар се потрошени 582 илјади евра.
За ентериерот, позлатените орнаменти и осветлувањето се потрошени 11, 5 милиони евра.
А во театарот најмногу до израз доаѓаат орнаментите со златна боја, плафонот на главната сала кој е во црвено златна боја и големите лустери кои треба да потсетуваат на изгледот на стариот театар кој се урна во земјотресот во 1963 година.
Дури и тоалетите во театарот се во златна боја, но таму се уште нема вода .
Извори на НОВА велат дека ентериерот не е довршен, а дека има и сериозни пропусти, кои допрва ќе треба да се поправаат. Така на пример, во малата сцена во последниот ред на гледалиштето нема простор за седење, балконите на галериите се ниски, па претставуваат ризик за публиката која ќе седи таму, најверојатно и тие ќе треба да се поправаат. Гардеробите за актерите и други помошни постории воопшто не се направени и нема тоалети. Звучниците се поставени премногу блиску до седиштата. Паѓаат плочки од надворешноста на зградата.
Новиот театар е дело на архитектот Јован Стефановски Жан и на неговата ќерка Ивана Стефановска.