По објавувањето на намерите на Министерството за транспорт и врски да продаде дел од Плоштадот Македонија и да го определи изгледот на идната зграда, невладината Плоштад Слобода излезе со барање до општина Центар за измени на ДУП за Мал Ринг.
Се работи за парцелата на плоштадот Македонија и за три зелени простори околу МОБ, кои со последните измени на Деталниот урбанистички план се пренаменети во комерцијално-деловни објекти.
„Единствениот празен простор на Плоштад Македонија одамна е мета на власта, намените беа често менувани (црква, Народна банка, трговски центар), а своевремено и МПЦ ја откупи парцелата за само 44 илјади евра“, велат од Плоштад Слобода.
За трите парцели околу МОБ, во барањето на Плоштад слобода се вели: „овие простори се единственото преостанато градско зеленило во Мал ринг од левата страна на реката Вардар. Сиот останат простор во овој дел на градот е веќе поплочен, асфалтиран и ставен во корист на институциите и приватните сопственици. На овие парцели се засадени десетици дрвја од различни сорти кои дополнително го освежуваат и прочистуваат воздухот (посебно дрворедот крај бул. Гоце Делчев).“
Во неодамна спроведена студија за зеленилото во Мал Ринг, пред да се уништат парковите кај старата железничка станица и седиштето на ВМРО-ДПМНЕ, Плоштад Слобода укажа на драстичен пад од 50 отсто.
Поточно, во 2012 година во „Мал ринг“ има 34.994 квадратни метри зелени површини, што е 50 отсто помалку отколку во 2002 година кога имало 75.649 квадратни метри. Со уништување на зеленилото на овие четири парцели, дополнително ќе се влоши состојбата во центарот на градот.