Ургентниот центар на скопските хируршки клиники е во катастрофална состојба. Додека Градската хируршка болница „Св.Наум Охридски“поради реновирање во наредните три месеци пациентите ќе ги препраќа во другите болници, се поставува прашањето дали Ургентниот центар ќе може да одговори на потребите.
Од фотогалеријата на НОВА може да се видат условите во кои се примаат и им се дава терапија на итните случаи. Искршени плочки, распаднати ѕидови, дотрајани носилки, стари апарати, корозирани масички за прибор од кои излегла бојата. Вака изгледа Ургентниот центар каде дневно поминуваат од 300 до 400 пациенти, а во ноќната смена и стотина итни случаи.
[Best_Wordpress_Gallery id=”6″ gal_title=”Ургентен центар”]
Во Ургентниот центар се примаат најтешките и најургентни случаи од цела држава. Се примаат повредени од сообраќајни незгоди, со скршеници, повредени во престрелки како што беше случајот со Диво Насеље, тука беа примани ранетите од конфликтот во 2001 година.
Но, во последно време во просториите на Ургентниот центар нема услови за пациентите, ниту за работа на медицинскиот персонал. Апаратот за Компјутеризирана томографија кој е донација од амбасадата на САД, воопшто не функционира.
Според медицинскиот персонал Ургентниот центар на Универзитетскиот клинички центар е во очајна состојба. Просторот каде што има огромна фреквенција на луѓе преставува и опасност од инфекции. Нема најава за негово реновирање, ниту за апарати кои се неопходни за ургентните случаи. Се уште не е на повидок изградбата на новиот Клинички центар кој беше најавуван четири години по ред, каде што треба да биде сместен и Ургентниот центар. На пациентите кои плаќаат здравствено осигурување им останува да се лекуваат во вакви лоши услови, а никој не кажува дали и кога ќе се подобрат.