Двајца европратеници, членови на Европската народна партија (ЕПП), Елмар Брок и Андреј Ковачев испратија писмо до претседателот на ВМРО-ДПМНЕ, Никола Груевски во однос на организацијата „Стоп Операција Сорос“ која нападна над 20 организации дека деструктивно влијаеле на Македонија.
Брок и Ковачев се дел од Унијата на Европски Федералисти, под кои спаѓаат Младите Европски Федералисти, чија канцеларија во Македонија исто така беше нападната од Цветин Чилиманов и СОС.
Во писмото, европратениците бараат од Груевски, поради блискоста со ставовите на Чилиманов, да преземе мерки и да одговори дали ги споделува европските вредности и принципи кои ги застапуваат тие.
Писмото во целост:
Драг господине Груевски,
Би сакале да се осврнеме на еден инцидент кој можеби сметате дека не е обемен но праќа вознемирувачка порака за европската ориентација на Македонија, дури и во круговите на најцврстите поддржувачи за приближувањето на земјата кон ЕУ.
На 3 февруари 2017 година, организацијата СОС – Стоп операција Сорос одржа прес-конференција на која ги нападна организациите за кои тие тврдат дека ги подриваат националните интереси на Македонија. Се изненадивме дека една од организациите е и Младите Европски Федералисти (ЈЕФ). Говорникот на прес-конференцијата, господинот Цветин Чилиманов, според наши сознанија уредник на владината агенција за вести ги опиша ЈЕФ како контроверзна организација а нашите идеи ги опиша како „смртоносни и опасни“.
Сакаме да истакнеме дека ЈЕФ и нејзината секција во Македонија е непартиска, плуталистичка и организација на млади која работи за слободна и соединета Европа, која се темели на принципите на демократија и владеењето на правото, мирот, просперитетот, безбедноста и правдата. ЈЕФ работи на длабока интеграција на Македонија во европското семејство која се надеваме ќе стане и членка. ЈЕФ Европа е дел од Унијата на европски федералисти во која ние сме претседател и потпредседател.
Со оглед на блискоста меѓу раководството на СОС и на владата и неодамнешните изјави на владини политичари за таканаречен процес на “десороизација“, загрижени сме за нашите активности таму како и за тоа дека Владата на Македонија не ги дели иститите вредности. Веруваме дека имате моќ да ги стопирате нападите врз Европските Федералисти во вашата земја и бараме од вас да ги преземете неопходните мерки кои ви се на располагање за да го негувате граѓанското општество и да ги поддржите нашите заеднички европски вредности и цели.
