МЗТ Скопје Аеродром ќе биде единствен претставник од Македонија во сезоната 2017/18 во АБА лигата. Ова е епилогот од денешното генералното Собрание на регионалното кошаркарско натпреварување во Загреб од кое произлегоа серија заклучоци и одлуки во насока за засилување на квалитетот на проектот и уште поголем негов прогрес во иднина.
Делегатите на Собранието со мнозинство гласови се изјаснија за намалување на Лигата од 14 на 12 клуба за наредната натпреварувачка сезона. Според основната формула за поделба на местата по три екипи даваат Србија и Хрватска и по една Црна Гора, Словенија, БиХ и Македонија. Преостанатите две покани ќе одат за земји со најдобар национален рејтинг во сезоната 2016/17. Тоа се Србија и Црна Гора.
Сигурни учесници во јадранското кошаркарско друштво во сезоната 2017/18 се: Цедевита, Цибона, Задар, Будуќност, Морнар, Унион Олимпија, Игокеа и МЗТ Скопје Аеродром. Четири српски репрезенти ќе бидат одредени по зависност од конечниот пласман во националното првенство.
Собранието на АБА лигата изгласа и три новини што треба да бидат традиција во иднина. Едната се однесува на Суперкуп турнир чиј домаќин на премиерното издание оваа година ќе биде Бар. Втората предвидува организацијана неколку турнири за кошаркари до 19 годишна возраст. И третата е воведување на Втора лига што треба да стартува наесен и во неа би учествувале по два тима од секоја од шест држави.