Министерот за образование и наука, Арбер Адеми порача дека се потпишани одлуките за избор на најповолна понуда за учебници и, според него, прашање на време е кога ќе се испечатат и ќе бидат дистрибуирани до сите училишта.
„Одлуките за избор на најповолна понуда се потпишани. Прашање е на време кога ќе се испечатат новите учебници и ќе бидат дистрибуирани до сите училишта“, изјави Адеми.
Министерот за понеделник најави нова средба со претставници на Самостојниот синдикат за образование, наука и култура (СОНК) кој на првиот ден од новата учебна година испорача барање за покачување на платите на просветните работници. Адеми не сака да размислува на негативни сценарија и верува во постигнување на договор.
Во основните и средните училишта оваа година наставата почна еден ден подоцна, поради предупредувачкиот штрајк на наставниците членови на СОНК и тие што солидаризираа со нив. Штрајкувачите во првиот училишен ден беа на работа без обврски, а оние кои не се приклучија кон штрајкот одржуваа настава.
СОНК во понеделникот даде рок од дополнителна недела пред МОН да се произнесе по барањето за повиско плати во образовната дејност. Ако не се нивните барања, најавен е генерален штрајк во основните и во средните училишта.
„Од МОН ни побараа плус време за преговори во кои се утврдува процентот на зголемување на платите и времето од кога тоа би се случило. Објаснија дека им треба време за пресметки и консултации со други институции. Одлучивме да дадеме седум дена“, изјави тогаш претседателот на СОНК, Јаким Неделков.
Наставниците не се задоволни од пет процентното зголемување на платите и бараат повисоки плати за 25 отсто.