Училишната година не мора да заврши на 10 јуни, истакна на министерот за образование Арбер Адеми на денешната прес конференција, по владините мерки за прекин на наставата во наредните 14 дена поради коронавирусот.
„Имаме нов Закон за основно образование во кој е предвидено колку наставни денови треба да има училишната година. Исто така е јасно предвидено и што треба да направат надлежните институции кога имаме ваква вонредна состојба. Имаме две опции. Првата е дека училишната година не мора да заврши на 10 јуни, а втората се однесува на подготвување на скратени наставни програми. Пред да се определиме за која било опција треба да се измени и дополни годишниот календар за организирање на настава. Така што образовните институции ќе бидат благовремени известени од нашата страна. Ова изменување и дополнување на календарот може да се направи и сега и по 14 дена, зависно со какви ситуации и состојби ќе се соочиме“, рече Адеми.
Адеми посочи дека за средните училишта наставата може да се организира за време на викенди или со скратени програми. Тој апелира до општините и до самите раководства на училиштата да организираат дезинфекција на образовните институции, конкретно на основните и средните училишта.