Поради неприсуство на тројца адвокати, Судот го одложи денешното рочиште за предметот на Специјалното јавно обвинителство „Топлик“.
Судијата Осман Шабани парично ги казни со по 1 000 евра адвокатите на обвинетиот ексминистер за транспорт и врски Миле Јанакиески – Еленко Миланов и Сања Алексиќ и штипскиот адвокат Дончо Наков, со образложение дека иако биле уредно повикани за денешната главна расправа не се појавиле на судењето, објави Макфакс.
Адвокатите со писмени поднесоци испратени на 19 септември го известиле Судот дека поради судењето за настаните од 27 април нема да можат да присуствуват на рочиштето за „Топлик“.
Обвинетиот Јанакиески замоли судењето да се одложи затоа што не може да ангажира други адвокати кога процесот е во поодмината фаза.
„Не бегам. Сакам што поскоро да се соочам со сведоците“, рече Јанакиески.
Судијата Огнен Ставрев рече дека во Македонија има над 1 000 адвокати и само 9 судии во одделот за судење предмети од областа на организиран криминал и корупција и дека треба присутните да го почитуваат времето и распоредот на сите странки во постапката, но и времето на Судот.
На денешното рочиште со полиција беа донесени тројцата сведоци Емилија Путилин, Малинка Матевска и Василка Поп Ѓорѓиева кои не се појавија на минатото рочиште.
Во случајот „Топлик“ покрај Јанакиевски обвинети се уште 6 лица – за злоупотреба на службената положба при продажба на земјиште за месноста Сончев Град во Сопиште.