Одбраната на обвинетите во случајот ,,Рекет” ги оцени како неавтентични снимките од ,,Ла Верита“ што денеска се презентираа во Кривичен суд. Според адвокатот Сашо Дуковски, лицето Јордан Камчев, кој ги доставил материјалите до Обвинителството, е осомничен во друг предмет и има за цел да го прогласи за виновен неговиот клиент.
Денешното рочиште за „Рекет“ почна со задоцнување поради спроведувањето на Катица Јанева од домашен притвор во судот, а во моментот е пауза, по што рочиштето треба да продолжи со пуштање снимки што како докази ги доставил сведокот Јордан Камчев. Обвинителката Вилма Рускоска претходно кажа дека овие разговори не се обезбедени со посебни истражни мерки.
„Самостојна интерпретација е дека стануваа збор за разговори меѓу Јордан Камчев и Бојан Јовановски. Тоа не може да се утврди. Не може да се користи нелегална снимка како доказ. Не може да се цени како доказ врз која ќе се заснова пресудата“, реагираше адвокатот Дуковски.
Во дел од денешните снимки јавноста имаше можност да слушне како обвинетиот Јовановски му вели на сведокот Камчев да прифати дел од вината и да плати отштета. На тој начин, според Боки 13, ќе се затворел предметот ,,Империја“, против осомничениот Јордан Камчев.
„Сакам да ми кажеш што добивам, како добивам и кога добивам. Сакам сите да бидат задоволни. Јас сум директен човек. Кажи ова ќе биде во февруари, ова во март и да го исполнам својот дел“, е дел од разговорот меѓу Јордан Камчев, сведок во ,,Рекет“ и обвинетиот Бојан Јовановски-Боки 13 што беше презентираан во Кривичниот суд. Истите снимки беа објавени од италијанкиот весник „Ла Верита”.
Случајот „Рекет“ го води судијката Васка Николовска-Масевска, а обвинението го застапува шефицата на Обвинителството за борба против организираниот криминал и корупција, Вилма Рускоска. Првообвинетиот Јовановски се сомничи дека сторил кривично дело „перење пари и други приноси од казниво дело“, а Јанева и Милевски за „примање награда за противзаконито влијание“. Второобвинетата Јанева се товари и дека сторила и кривично дело „злоупотреба на службена положба и овластување“. На првото рочиште за „Рекет“, што се одржа на 3 декември, третообвинетиот Зоран Милевски-Кичеец призна вина и беше осуден на три години затвор.