Поранешниот словачки министер за надворешни работи Мирослав Лајчак објави дека се повлекува од функцијата советник на словачкиот премиер Роберт Фицо, откако неговата преписка со осудениот сексуален престапник Џефри Епштајн стана јавна, објавија словачките медиуми.
Роберт Фицо во саботата попладне објави дека ќе ја прифати неговата понуда да си замине.
Миро повторно се покажа како одличен дипломат и ја прифаќам неговата понуда да ја прекинеме нашата соработка, иако сите ние, не само јас, губиме неверојатен извор на искуство во дипломатијата и надворешната политика – рече словачкиот премиер Фицо, кој е и претседател на партијата Смер.
Заминувањето на Лајчак доаѓа по објавувањето на неговите комуникации со американскиот сексуален престапник Џефри Епштајн.
Притисокот Лајчак да си замине порасна откако Министерството за правда на САД во петокот објави повеќе документи од истрагата за Епштајн, вклучувајќи бројни пораки од Лајчак, кој исто така се допишувал со Епштајн за „девојки“.