Нема ништо спорно што навивачката група „Шверцери“ прославувала јубилеј 30 години постоење во Македонскиот национален театар (МНТ). Ова е став на лидерот на Демократската унија за интеграција (ДУИ), Али Ахмети при положување на цвеќе пред споменикот на Скендербег по повод Денот на албанското знаме.
„Што се однесува до материјалната штета на театарот, тоа е друго прашање што ќе го процени Министерството за култура, но не мислам дека луѓето отишле таму за да предизвикаат штета или вандализам“, рече Ахмети кој додаде дека прослави на навивачки групи во театри има и во Германија, во Велика Британија и други земји.
Навивачката група „Шверцери“ во петокот доби свои „пет минути“ во петокот во МНТ по Свечената Академија за одбележување на 111 години од Денот на албанската азбука. Во нивна чест имаше проекција на документарен филм, но однесувањето не мина без последици по инвентарот во објектот. И додека Ахмети застана во одбрана на симпатизерите на чаирчани за кои рече „дека немале намера да предизвикаат штета или вандализам“, реалноста е поинаква.
Директорката на МНТ, Симона Угриновска во изјава за НОВА ТВ наведе дека „се скршени даскички од украсните лајсни, исечен тапацир, скокање по столчињата“. Како организатор на првиот настан (Свечена Академија по повод Денот на албанската азбика) било Министерството за политички систем, а лице за контакт за вториоот настан во вечерта (30 години од формирањето на „Шверцери“) бил Артан Груби, актуелен пратеник од ДУИ и поранешен член на самата навивачка група.
„Најмногу штета е причинета на ентериерот на големата сцена и фоајето. Тоа се гледа и од видеата што се достапни преку социјалните мрежи. Но, јас мора да разграничам. Во петокот имаше два настана. Проблематичен беше вториот настан, првиот не. И ова што се случи беше најавено дека е во делот на одбележување на Денот на албанската азбука. Немавме синопсис за настанот што е вообичаено и бараме да ни приложат за секој настан и никој не очекуваше такво нешто. Само ни беше речено дека ќе има проекција на документарец и толку. Ниту бевме информирани кој ќе биде како публика. Сите напори да добиеме било каква информација останаа залудни. Бидејќи мислевме дека е во рамки на првиот настан, кој мина во најдобар ред и како гостин се појави премиерот, имавме доверба“, изјави Угриновска за НОВА ТВ.
Македонскиот национален театар е под капа на Министерството за култура и одлуките за отстапување на објектот за прослави од јавен интерес се носат во меѓусебна координација меѓу трите страни. Не е првпат тука да се одржуваат и настани поврзани со спортот. Неколку години наназад во МНТ се организира и прогласувањето на најдобрите во македонскиот фудбал во организација на Фудбалската федерација на Македонија (ФФМ), меѓутоа досега не било забележано оштетување на инвентар во објектот.