Министри, пратеници и функционери од ДУИ, лидерот на партијата Али Ахмети, претседателот на Собранието Талат Џафери, денеска положија цвеќе пред споменикот на Ѓерѓ Кастриот – Скендербег по повод 550-годишнината од неговата смрт. Пред положување на цвеќето беше интонирана албанската химна.
Лидерот на ДУИ Ахмети изјави дека Скендербег е национален херој на Албанците, но, како што рече и на сите народи кои го сакаат мирот на Балканот.
– Скендербег е најсимболичната фигура на Албанците и на другите народи на Балканот и инспирација за сите потиснати народи. Тој останува централна личност за сите народи на Балканот кои го сакаат мирот. Денеска достоинствено можам да кажам дека и Охридскиот договор е во духот на Скендербег, рече Ахмети.
Одговарајќи на новинарско прашање зошто нема претставници од другите партии на Албанците, но и на Македонците, Ахмети истакна дека имало јавна покана за сите.
Претходно, свечена академија посветена на 550 години од смртта на Ѓерѓ Кастриот-Скендербег се одржа во Собранието на Република Македонија, на која се обратија претседателот на Собранието Талат Џафери, директорот на Институтот на духовното и културното наследство на Албанците Скендер Асани, директорот на Институтот за национална историја Драги Ѓеорѓиев и проф. Владо Поповски, историчар и член на Одборот за одбележување на годишнината.