Претседателот на Демократската унија за интеграција (ДУИ) Али Ахмети, во синоќешното интервју за ТВ Клан порача дека е неопходен ветинг.
„Нашата земја има сериозна потреба од ветинг. Ветинг за политичари, за министри, за пратеници, за градоначалници, за судии, за обвинители, за сите. ДУИ е единствената партија што побара да се испита од обвинителството. Јас лично сум го побарал тоа од Катица Јанева, затоа што се соочуваме со клевети секој ден. Затоа ние бараме владеење на правото преку ветингот“, рече Ахмети.
Ахмети потоа истакна дека со ветинг и со владеење на правото, се стигнува до неселективната правда како предуслов за економски развој и правна предвидливост. На прашањето за ставовите на опозицијата против договорот од Преспа и Законот за јазик, Али Ахмети истакна дека овие ставови се дневна политика за моментални потреби.
„Секој треба да знае дека нема враќање од јазичната еднаквост, промената на името и добрососедството. Европа е силно заинтересирана за Македонија и Албанија да започнат преговори за пристапување во ЕУ во март“, рече Ахмети.
Ахмети додаде дека самите челници на ЕУ оцениле дека неуспехот за отворање преговори за Македонија и за Албанија е срам за Европа и Брисел.