Храната од која појадувале вработените во фабриката Леар во Тетово во саботата на 7 јули била соодветно дистрибуирана, чувана и послужена, во оригиналното пакување и со адекватен рок на употреба. Ова го утврдила Агенцијата за храна и ветеринарство, откако пред два дена беа затруени 25 вработени од Леар, најверојатно од салама и паштета која ја појадувале.
Според Агенцијата, мензата ги исполнува хигиенските услови поради што не е изречена мерка за нејзино привремено затворање.
Од Агенцијата соопштија дека во соработка со Санитарната инспекција, зеле мостри за лабораториско испитување од храната која била послужена, од работните површини во мензата, како и од вработеното лице што ја послужувало храната, а на кое му било извршен и дополнителен здравствен преглед.
Од Агенцијата велат дека дополнително ќе ја информираат јавноста, која била точната причина за труењето на работниците. Апелираат во услови на висока температура и зголемен ризик од расипување на храната и појава на труења, граѓаните да внимаваат од каде купуваат храна.
Во март оваа година, 220 вработени од истата фабрика беа затруени откако вечерале макарони со сос и мелено месо. Бактеријата стафилокока беше причината за масовното труење на работниците.