Агенцијата за храна и ветеринарство денеска соопшти дека во моментов врши вонредна инспекциска контрола кај операторот со храна производител на леб и бели печива, по објавената фотографија на социјалните мрежи за еден од објектите на операторот, на која се гледа глодар на една од масите каде се послужува храна.
-Во рамки на законските надлежности, инспекциските служби на Агенцијата вршат проверка дали од страна на овој оператор со храна се почитуваат пропишаните општи и посебни барања за безбедност на храната, вклучително и тоа дали се спроведени мерките за дезинфекција, дезинсекција и дератизација, се вели во соопштението.
Од Агенцијата истакнуваат дека во првите 6 месеци од годинава извршени се вкупно 8.336 инспекциски надзори кај оператори со храна од неживотинско потекло, од кои кај пекарници, бурекџилници и трговци со леб и бели печива 1.027 контроли. Со контролите констатирани се пропусти од помал обем кои се однесуваат на имплементацијата на Добрите хигиенски и производни пракси или HACCP системот, како и по однос на несоодветно означување на производите. Инспекциските служби изрекле 156 наредби за отстранување на констатираните недоследности, даден е налог за 82 едукации, а изречени се и 2 времени забрани.
Исто така се апелира до граѓаните секоја недоследност да ја пријават до надлежните институции, на бесплатната телефонска линија за потрошувачите на Агенцијата за храна и ветеринарство 0800 3 22 22, лично, или на електронската пошта info@fva.gov.mk.