Агенцијата за храна и ветеринарство при неодамнешна контрола открила присуство на ГМО во ориз и шницли од соја.
Како што соопшти директорот на АХВ, Зоран Атанасов оризот е македонско производство од кочанско, но од ГМО семе, чие потекло допрва ќе се утврдува. Соините шницли се со потекло од Србија, а кај нас се продавани од „Виталија„. Атанасов рече дека овие шницли биле во продажба, но сега цела серија се повлечени. Не е познато дали и колку од нив веќе се продадени.
Се работи за 550 килограми ориз. Засега се знае само кој е откупувачот, но не и производителот на семето, што ќе се утврдува со Министерството за земјоделство.
Оризот е во магацините и е под надзор, а наскоро ќе биде уништен.
Агенцијата изрекла казни од 5.000 евра за фирмата и 1.700 евра за одговорното лице.
За соините производи се чекаат резултати од суперанализата од европската референтна лабораторија, по што и оваа пратка ќе биде уништена.
Атанасов истакна дека според нашето законодавство, производство и продажба на ГМО храна кај нас е забрането. Тој посочи дека за штетноста на овие поризводи за здравјето на лушето, треба науката да каже, но објасни дека двата члена од Законот за безбедност на храна, 55 и 56 со кои било дозволено производство и продажба на вакви производи но под строги правила, одамна се избришани и се во мирување, се до влезот на Македонија во ЕУ.
Атанасов исткна дека е невозможно граѓаните да препознаат вакви производи, освен доколку тоа не стои во декларацијата или не се докаже лабораториски.
АХВ во следниот период ќе ги засили контролите при увозот. Конкретно во однос на оризот, ќе се утврдува производителот, увозниците, на кого е продадено тоа семе, ќе се земат мостри и ќе се утврдува составот.
Директорот на АХВ денеска соопшти и дека во рамки на проверката на квалитетот на храната, откриено е дека кај пет производители на мелено месо и производи од месни преработки, освен декларираното јунешко и свинско месо имало и живинско месо кое според сегашниот правилник не е дозволено за ваков тип на производи.
Производителите се казнети со по 5.000 евра, а одговорните лица со по 1.700 евра парична казна и оваа постапка е завршена.