Агенцијата за храна и ветеринарство тврди дека во Македонија не е увезено месо од белгиската месна индустрија „Вевиба“, која е затворена откако е утврдено дека продавала месо и месни производи во кои имало делови од животни кои не се за човечка конзуманиција.
Од АХВ велат дека преку Системот за брзо предупредување за небезбедна храна и храна за животни на Европската Унија, Агенцијата досега не добила известување дека вакво месо има во Македонија.
– Во земјава од Белгија, од други месни индустрии, во првите два месеца од годинава увезени се 228.860 килограми месо и преработки од месо, а во 2017 година, извршен бил увоз на 928.570 килограми. Месото и преработките од месо кои се увезуваат во Македонија се безбедни. Инспекциските служби на Агенцијата за храна и ветеринарство вршат задолжителна контрола на секоја увозна пратка на граничните премини. Контроли се вршат и при истовар на увезените пратки. Покрај задолжителниот преглед на документацијата, се прави и преглед на идентитет и физички преглед на пратките, велат од АХВ.
Скандалот со „Вевиба“ се појави на почетокот на овој месец, а пред три дена белгиски медиуми известија дека месо старо 12 години било извезено и во Југоисточна Европа. Компанијата ги фалсификувала податоците за рокот на траење, а во месото и преработките ставале делови од животински тела кои не се дозволени за човечка консумација, како и „кланички отпад“.