Роналдо јуниор тргна по стапките на Роналдо сениор. Осумгодишниот син на португалската фудбалска звезда го одработи првиот тренинг со У9 тимот на Јувентус во Академијата во Торино. Друштво има во Матео Барзалји, син на дефанзивецот на „старата дама“, Андреа Барзалји и во Давиде Маркизио, син на Клаудио Маркизио.
„Кристијано не сака да губи и сигурен сум дека ќе биде како мене. Сто отсто сум уверен во тоа. Секако дека би сакал еден ден да стане фудбалер каков сум јас. Поседува брзина, удар, техника и добро момче е. Но, не планирам да создавам притисок на него“, истакна 33 годишниот Португалец.
Ѕвездата на „бјанконерите“ признава дека за неколку години сака на фудбалските терени повторно да завладее Кристијано Роналдо. И самиот во последните години споделуваше видео клипови на кои неговиот син демонстрира фудбалски вештини од најрана возраст.
И додека фановите на Јувентус се воодушевени што клубот го доби Роналдо јуниор, од Роналдо сениор и натаму желно го чекаат првиот погодок во сезоната во Серија А. Првата наредна прилика е мечот против Парма на стадионот „Енио Тардини“ на први септември (20.30 ч.).