Пет општински службеници од Тетово претпладнево се приведени во полиција поради сомнение за вмешаност во незаконска приватизација и легализација на земјиште. Истрага против нив отвори Обвинителството за гонење на организиран криминал уште на почетокот на годината во која е опфатен и членот на Судскиот совет, Зоран Теофиловски, кој не се појави на денешната седница што беше закажана за 10 часот. Сите се сомничат за злоупотреба на службена положба и овластување.
Првичните информации за случајот се однесуваат на тениско игралиште во државна сопственост што на нелегален начин било легализирано, а подоцна и приватизирано за потребите на спортското здружение „Љуботен“ во период во кој негов претседател бил Теофиловски. Од Обвинителство за Нова ТВ ја потврдија акцијата и најавија официјално соопштение во текот на денот.
Инаку на денешната седница на Судскиот совет требаше да се бираат нови судии на Апелацискиот суд, но истата е одложена по новогодишните и божиќни празници. Како причина за тоа не било отсуството на Теофиловски, туку потребата на Советот да се запознае со кандидатите.