Голем број политичари, функционери или поранешни функционери, главно од високите нивоа на централната и локалната власт, го минаа прагот на зградата на СПАК за време на минатата година во Тирана, резимираат албанските медиуми.
Во Косово, од 1 јануари 2024 година, граѓаните ќе можат да патуваат без визи во земјите од Шенген зоната.
Ова се дел од темите од редакцискиот избор на ЦИВИЛ Медиа, од албанските медиуми во регионот, за првото издание на АЛ-Прес во 2024 година.
АЛБАНИЈА
Газета Тема: 2023 година во Албанија, во знакот на СПАК!
Во Албанија, Обвинителството и Специјалниот суд беа во центарот на вниманието во текот на 2023 година. Голем број политичари, функционери или поранешни функционери, главно од високите нивоа на централната и локалната власт, го минаа прагот на зградата на СПАК за време на минатата година во Тирана, од каде не заминаа сите, пишува Газета Тема.
ДВ: Поранешниот премиер Бериша е ставен во домашен притвор
„Специјалниот суд против корупција и организиран криминал во Албанија, (ЃККО) одобри во саботата 30.12.2023 барањето на Специјалната антикорупциска структура (СПАК) против него да се преземе безбедносна мерка куќен притвор.“, пренесе Дојче Веле на албански јазик.
КОСОВО
РСЕ: Граѓаните на Косово ќе можат да патуваат без визи во земјите од Шенген зоната
Од 1 јануари 2024 година, граѓаните на Косово ќе можат да патуваат без визи во земјите од Шенген зоната.
Либерализацијата на визите им овозможува на граѓаните на Косово, кои имаат биометриски пасоши, да престојуваат до 90 дена – во рок од шест месеци – во која било од 27-те земји-членки на Шенген зоната, пренесе Радио Слободна Европа.
Епока е Ре: Почеток на големиот судски процес и нови обвиненија од Хаг
Хаг беше центар на случувањата за поранешните водачи на ОВК. Таму почнаа судења и беа донесени пресуди од втор степен. Но, за работата што се одвива во Хаг, во текот на 2023 година вниманието беше насочено и кон Косово. Следствено, беа потврдени и нови обвиненија за мешање во правдата, пишува Епока е Ре.
Газета Експрес – Реутен: По визите, следниот чекор на ЕУ е да му даде кандидатски статус на Косово
Пратеникот од редовите на Прогресивната алијанса на социјалистите и демократите (С&Д) во Европскиот парламент (ЕП), Тијс Реутен, смета дека следниот чекор на Европската унија во однос на Косово по визната либерализација ќе биде натамошната обработка на косовските апликација за членство во Унијата, пренесе Газета Експрес.
КОЛУМНА
Коха: Лажните две евра како валута на нашето лице
„Не требаше многу време за фалсификуваните монети да станат секојдневие, мерењето на нивната тежина, тестирањето со магнетно стапче, да стане ритуал. Почнав да собирам лажни монети, кога веќе беше нормализирана нивната лажност, заедно со нејзината безвредност на пазарот. А лажните две евра веќе ни станаа валута на лицето“, пишува авторот Гранит Курти во колумната „Лажните две евра како валута на нашето лице“, објавена во Коха.
Подготви: Д. Тахири
Извор: Цивил Медиа