Албанската опозиција го повикува обвинителството да не подлегне на политички игри.
Тие коишто пред само 24 часа рекоа дека е време за предизвици, а не за оставки, по објавувањето на првите индиции за трагични грешки во изградбата на модуларната болница во Тетово, даваат оставки, реагираат од Алијанса за Алабанците по оставката на четирите функционери во министерството за здравство. Оттаму велат дека оставките се задоцнети за да се оправда, како што велат, нефункционалната влада која мора да поднесе оставка.
– Во минатото видовме случаи што завршија со оставка и во следниот мандат со повторно назначување на истите функционери во други оддели, но без никаква кривична одговорност. Трагедијата во Тетово го потресе светот, избриша 14 животи и ги изгори срцата на сите нас. Овој случај не смее да остане без правда и без одговорност. Го повикуваме обвинителството да не подлегне во политички игри, да дејствува итно и да не дозволи ниеден од осомничените да избега и да ни се случи „Будимпешта 2“.