Министерот за култура, Роберт Алоѓозовски, на прес-конференција денеска го претстави Предлог-буџетот за 2018 година и неговите клучни аспекти.
Како што рече тој со буџетот за 2018 година, Министерството ги крати мегаломанските и непродуктивните трошења, а вложува повеќе пари директно во културата и уметноста, обезбедува подобри услови за работа на сите уметници, културни работници и стручњаци од јавниот културен сектор и слично.
Вкупниот буџет на Министерството за култура за 2018 година изнесува 4 милијарди 268 милиони и 497 илјади денари, односно околу 69 милиони и 406 илјади евра, што претставува зголемување од 4.48% во споредба со лани.
Во вкупниот буџет на Република Македонија, буџетот на Култура учествува со 2 %, што е процентуално најголем културен буџет споредено со земјите од регионот.
Околу над 92% од планираните средства од вкупниот буџет на Министерството за култура се предвидени за финансирање на дејностите од областа на културата, додека околу 8 % се предвидени за трошоците на администрацијата на Министерството за култура.
„Споредено со лани, за трошоците на Министерството годинава предвидовме над 112 милиони денари помалку, додека за директно финансирање на дејностите и проектите во културата за 2018 се предвидени над 200 милиони денари повеќе“, рече Алоѓозовски.
За сервисирање на обврските за изградбата на Македонската филхармонија Министерството од буџетот издвојува 15 отсто, или 600 милиони денари, а 13 % ќе се потрошат за изградбата на Албанскиот Театар во Скопје и Театарот и Библиотеката во Тетово.
За драмска дејност се издвјуваат 12 %, додека 11 % за заштита на културното наследство.
Од буџетот, 9 % се наменети за музичка и сценско – уметничка дејност, 7% за фолклорна и сценско – уметничка дејност, 6.9% за музејската дејност, 6.3% се за блок-дотации до единиците на локалната самоуправа, а околу 4 % или 154.5 милиони денари за Агенцијата за филм.
За драмската дејност зголемен е вуџетот за разлика од претходниот, додека за заштита на културното наследство за 21 %.
„Во делот на капиталните проекти, ќе инвестираме 10 милиони денари во реконструкција на Офицерскиот дом во Битола, а обезбедивме 10 милиони денари за изградба на Спомен обележје на Тоше Проески. Освен тоа, обезбедивме дополнителни 70 милиони денари за сервисирањето на долговите за изградбата на Македонска филхармонија со што ја спречуваме опасноста од напластување на долговите и каматите на штета на буџетот“, рече меѓу другото Алоѓозовски.
Тој потенцираше дека со буџетот за 2018 година, се става крај на проектот Скопје 2014, и дека нема да има понатамошни средства за овој проект, кој што го одбележа владеењето на поранешниот премиер Никола Груевски, кој во јавноста важи за иницијатор на проектот.